14 تراك شرقي تانيين لازم تسمعهم قبل ما تموت

لقراءة الجزء الاول دوس هنا

مفيش شك ان الموسيقى من اهم الحاجات الموجودة فى الحياة و هى تقريبا اكتر حد بيفهمك و بيشاركك كل الحالات اللى بتدخل فيها من فرح و حزن و قلق و كل حاجه من غير ما تسألك اسئلة رخمه بتقعد جنبك و تشتغل و تعيش معاك فى المود, كنا زمان بنسمع حاجات اقل حاجه تقال عليها هي استغفر الله العظيم بس الحمد لله  مؤخرا بعد ما انتشر برنامج soundcloud  و انتشرت اماكن ثقافية كتيرة فى مصر انتشر معاهم انواع موسيقي كتير اوى مكناش نعرفها و عرفنا مغنيين كتير برضه مكناش نعرفهم, احنا هنا هنتكلم عن كذا تراك لو مسمعتهمش هيفوتك كتير اوى , هنتكلم عن الدرر و الحاجات الخفيّة المتدارية الغير التجارية اللى صانعيها عاملينها علشان هما فعلا عايزين يعملوها مش علشان (الشارع عايز كده ), يعنى مش هتلاقي تراك لتامر عاشور او لعمرو دياب او شيرين مع احترامنا ليهم طبعا ....بسم الله و نبدأ سحلة الدماغ مع بعض

14- تانجو ياسمين حمدان

ياسمين حمدان المغنية الرئيسية لفريق الصابون يقتل او Soapkills , اللى يجذبك فى التراك ده هى طريقة غنا ياسيمن حمدان اللى فيها انوثة عالية اوى لدرجة ان و انت بتسمعها احيانا هيوصلك نفس الاحساس اللى بيوصلك لما بتشوف صورة لسكارليت جوهانسين او فيلم لميرفت امين مثلا, التراك ده فى دخلة كمنجا حزينه كدا ممزوجه باصوات الكترونية كعادة اغانى الباند مع صوت ياسمين اللى بتدعوا بيه حبيبها انهم يستغلوا كل لحظة فى حياتهم و يستمتعوا بيها "قبل انقضاء الشباب و موت الحب و انقطاع الرجاء" و تحس ساعتها فعلا انك محتاج تراجع كل القرارات المتأجله "قبل انقضاء الشباب و موت الحب و انقطاع الرجاء"

13- ابن عربي تحيي اذا قتلت

من جديد نسمع "دف" ابن عربي اللى هو من احلى الاصوات اللى بحبها فى حياتى هي و عود انور براهم, دف ابن عربي هو مش مجرد دف هو فعلا تحسه دقات قلب كل الناس اللى عايشه على الكرة الارضية و دقات قلب الكون ذاته, ده غير العنوان "تحيي اذا قتلت" فى جمال كدا!!! الكلمات لمولانا الامام الاكبر "ابن عربي" واحد من اكبر الائمة الصوفيين و الكلام معقد جدا و ممكن يتاخد باكتر من تفسير كعادة الشعر الصوفي ان هو مكتوب لله و فى نفس الوقت يتفهم انه مكتوب للمحبوبة او للكينونة او الفراغ ذاته و لكن فى جميع الاحوال و التفسيرات هيبقى معدّى مع دقات الدف و الناى اللى هيلعب صولو فى نص الاغنية مفيش بعد كدا و صوته و هو بيقول "وحشية ما بها" 

12- عمر فاروق I love you 

التراك ده كنت بسمعه زمان اوى صدفة كدا فى التليفزيون و افضل مستنيه لحد ما عرفت اسمه و عرفت انه لعمر فاروق التركي و مندهشتش لان تركيا من احلى الاماكن اللى بيتلعب فيها مزيكا شرقي, التراك بدايته صولو رائع طويل على آلة الانون و بعد عزف طويل بيقف ثانيتين كدا سكون تام هما احلى حاجه فى التراك !! تخيل لما يكون ثانيتين سكوت بتكمن فيهم حلاوة التراك كله !!! لان بييجى بعدهم دخلة للالات كلها مع الايقاع من احلى الدخلات اللى سمعتها فى حياتى و بعدين بيعيدوا نفس النغمه تاني مع دخول عمر فاروق نفسه اللى بيلعب على آلة شبه الناي و تكمل معزوفة I LOVE YOU  

11- رشيد طه – يا را يح

موسيقى الراي و اغاني الراي و اشهر من غنوها رشيد و خالد و مامي, فى الفترة دى كان معظم مغنيين الراى بيهاجروا من الجزائر لفرنسا لانهم كانو بيتعرضوا لاغتيالات من جماعات اسلامية, بس الاغنية فى الاصل مش بتاعت رشيد هى بتاعت "دحمان الحراشى", لكن الجميل فى رشيد هنا انه دخل فيها مزيج غربي مع شرقي تحفه لما تسمع اليكتريك بيلعب مع عود مع صوت رشيد و هو بينصح اللى بيهاجرو من الجزائر انهم ميهاجروش و بيقولهم " يا الرَايح وين مسافر تروح تعيّا وتولي آش-حال.. ندمو العباد الغافلين قبلك وقبلي" , دخلة الاغنية من احلى الدخلات اللى سمعتها فى حياتى

10- مالوا - سعاد ماسي

سعاد ماسي بتتحسر على سنين العمر اللى راحت و الوقت اللى عدا و هى محستش بيه و مستغربة من كمية الحزن و الشجن اللى فى قلبها و ازاى قلبها بقى حساس للدرجة دي و هى بتقول " مالوا قلبى ولّى حساس", و كل دا واصل فى صوتها و هى بتغنى و متهيألى كل احاسيس العالم اتجمعت كده و اختزلت فى صوتها و هى بتقول كلمة "مالوا" فى اول الاغنية

9- منين اجيبك Egyptian Project

ربابة الشيخ سلامة و صوت سيد امام و دخلاته و طريقته و هو بيقول "يا غالي" فى التراك ده و الموال اللى فى آخره و كفي !!.....آه و كمان مره الموال اللى فى الاخر 

8- انور براهم - استراكان كافي

لو شفت الجزء الاول ممن القايمه هتلاقى انور براهم واخد مراكز كتير اوى و من ضمنها المركز الاول و هنا برضه هو واخد كذا مركز.ليه؟
لانه برنس بزياده اوي, موسيقي انور براهيم كالعادة بتاخدك فى مكان تاني, يعنى الراجل كل اليوم يحطله concept ميعن وآلات معينه و التراك كان فى البوم بيتلعب فيه اربع آلات بس هما العود و الباص جيتار و الكارينيت و الايقاع سواء طبله او رق , التراك  له نسختين منهم نسخة انور براهم بيلعب فيها التراك بالعود بس و مفيش اى الات تانية و النسخه التانية معاه البيس جيتار و الكلارينيت و الدف و كعادة المثل اللى بيقول كلمتين ابرك من عشرة فالاربع آلات دول عندى ابرك من اوركسترا كاملة, التراك فيه تيمه معينه بتتكرر طول ما هو شغال و هى النغمه اللى بدأ بيها فى الاول , انا خترت انى احطلكوا اللينك بتاع الاداء ال live بتاع التراك لان ال live بيكون احسن من الاستوديو بكتير ,انا ممكن اقعد اكتر مجلدات عن ازاى موسيقى انور براهم بتاخدك فى مكان تاني بس مش هقدر اوصف احساسي برضه و انا بسمع اى حاجه له

7- فتحى سلامه - نهاوند

فتحى سلامة من اكتر الموسيقيين اغراقا و تأثرا هبويته الشرقية و خصوصا المصرية بمعنى انه مش بتاع يلا نجيب تكنو و ايقاعات من برّه علشان نكون عالميين لا هو بتاع يلا نجيب عود و ربابة و نتمرمغ فى المحلية علشان نبقى عالميين لدرجة انه كان عامل اكتر من اغنية مع جمالات شيحة , و ده عامة بيبان فى كل شغله و فى اختياره للآلات اللى فى التراك يعنى دايما هتلاقى صاجات و كمنجات شرقي و ساعات ارغل و مزمار و من احلى تراكات و اهمهم فى رأيي هو تراك "نهاوند" اللى فيه تقسيمات بين الكمنجا و الايقاع و الصاجات بتاخدك للحظات شجن و فرحة و حزن و الانتقال بينهم ناعم اوى لدرجة انك مش هتحس بيه

6- حرم النوم - ريما خشيش

كلام شرقي اوي  باللغه العربيه و معاه فرقه كلها اجانب تقريبا و آلات معظمها غربي من كلارينيت لجيتار لكونتباص مع صوت من احلى الاصوات اللى ممكن تسمعها فى حياتك و هو صوت ريما خشيش و اللى بحس انه حنجرتها جواها بيانو عليه كل النغمات و حد بيلعب بيه بطريقه مجنونه و منظمه تخليها تطلع و تنزل و تغير المقام بكل سلاسه , ده غير حركات ايدها و هى بتغني اللى بتحسسنى بالعظمه فى و غير صولو الكلارينيت اللى فى نص التراك

5- ضافر يوسف - Les ondes orientales 

تمام يا جماعه ضافر يوسف كائن فضائي خلاص, اصل ازاى؟ لا بجد ازاى؟ و ازاى الراجل اللى بيلعب على البيانو ده؟ و ازاي الاصوات اللى طلعها ضافر فى نص التراك و ازاى نقل من اعمق اعمق بير قرار فى طبقة صوته لأعلي نغمه (تصل احيانا لحد السرسعة بس الممتعه برضه)فوق خالص؟ و ازاى التراك كله قايم على نغمة عود بيلعبها ضافر من اول التراك لاخره هيا هيا مش بتتغير ؟ لا بجد ازاى؟؟

4- قلوب العاشقين التوني

36 دقيقه اللى بيتقال فيهم كلهم تقريبا حوالى اربع جمل بس بيتقالوا بجميع المقامات و الطرق و حتى نبرات الاصوات اللى خلقها ربنا, تحس ان التونى كان مزاجوا عالى اوى فى التراك ده, بالنسبه لى التونى هو مثال للشخص اللى بيعمل الى هو عايزه و اللى فى دماغه و بعد كده اللى عايز يحب يحب و اللى عايز ميحبش ميحبش ,و كالعاده السبحه و الكاس فى اخر التراك بتلخص نص الكلام و فى حتت معينه التوني فيها بيغير صوته 180 درجه لدرجة انك هتتخض و تفتكر انه واحد تانى بيغنى ده طبعا غير قفلته المشهوره دايما "وحّد"

3- مانيفستو- مصطفى ابراهيم

مانيفستو هو مصطلح يطلق على قوانين الحروب, و فعلا القصيدة بتلخص حالة الثورة او الحرب و فيها جمل بتكون نصايح صريحة فى حالة الاشتباك زى "اكسر لمض كل العواميد اللى قايده نحيتك" و فيها حاجات فيها معانى دفينه كتير اوى و تحسها قواعد عامه فى الجياه زى " ماسبيرو اخطر من الرصاص و القصر", و فى النسخه الموجوده دى شغل موسيقى و مؤثرات حقيقيه و حلوه اوى متاخده من الميدان نفسه بتدخلك فى المود اكتر و بتحسسك انك واقف بتهتف جوا, انا فى رأيى ان حاجه زى المفروض تتدرس لطلبة المدارس بدل طلعت عليهم بالصباح من الظبا و الخرا اللى بياخدوه دا

2- اختطاف فى العصرية - Mozart In Egypt

ايه رايكوا؟ احنا نجيب مقطوعات موزارت و ندمجها مع موسيقى مصرية فولكلوريه  زى الصاجات و المزمار و الارغل؟ ممممممم

صولو الارغل اللى فى اول الاغنيه اللى تحسّه بياخدك لقعدة مسطبة فى ارياف مص  و بعدين الدخلات المجنونه للاوركسترا اللى بتاخدك لمسارح فيينا ايام موزارت و النقلات و بعد كده الرجوع للمصطبه تاني مع اللارغل و دخول موال اقل ما يقال عنه انه روعه

1- انور براهم - Galilee Mon Amour

حقيقي انا مش عارف اقول ايه؟!  بحس فى التراك ده ان الالات الموسيقيه بيحكوا كلهم انهم فى محنه و اول التراك الباص جيتار بحسه بيسأل باقى الالات فى قلق و خوف هنعمل ايه يا جماعه و الكلارينيت بيرد عليه و يقوله مش عارف و بعدين يدخل انور ابرهم بال vocals   الرقيقه بتاعته يهديهم مع الطبله و بعدين يهدوا و كل شوية الكلارينيت يفكرهم تانى بالمحنه اللى هما فيها , فعلا اربع آلات بس بيعملوا واحد من احلى التراكات اللى سمعتها فى حياتى

14 تراك شرقي لازم تسمعهم قبل ما تموت

القايمة دى مش مبنية على اى حاجة غير ذوقي الشخصي و لو حد شايف ان فى تراكات تانية كان لازم تتحط ممكن يحط القائمة بتاعته فى التعليقات تحت (ملحوظة القائمة لاتحتوى على اغاني حب من النوع المبتذل و لا على اغاني عمرو دياب و حماقي و 

تامر) ......بسم الله 

14- ضافر يوسف – Suopir eternal

ضافر يوسف عامة بيصوت مش بيغني الغني الطبيعي اللى احنا متعودين عليه انا و انت و حضرتك ممكن تكون مش بتحب النوع ده من الموسيقى بس لازم هتنبهر بالتراك ده لان طبقات الصوت اللى بيجيبها ضافر بحنجرته غير طبيعيه بالمرّة و تحسه انه بينافس او بيسابق فى التراك ده آلة الكلارينيت اللي بيعزفها فى الفيديو ده "حسنو" التركي اشهر عازف كلارينيت فى العالم و في الاخر بعد ما يوصل لل climax  بتاع التراك بيطلع العود بتاعه و يبدا بعد ما كان بينافس "حسنو" ياخد نفسه و يقسموا مع بعض تقسيمه تقطع قلب اى حد 

13-  كريمة نايت + فتحي سلامة – نورا

فتحى سلامة هو برنس الموسيقى فى مصر اللى محدش يعرفه علشان هو برنس مع كريمة نايت "غجرية الجزائر" فى مرثية او انشودة نورا – الحقيقة انا مش فاهم الكلمات اوى بس هى بتتكلم عن واحدة ماتت و الواحدة دي ممكن يكون مقصود بيها البلد بحالها بس المفاجاه ان لحن الاغنية بيخليك ترقص بدل ما تحزن و فى مزمار صعيدي بيتكرر طول الاغنية بنفس الطريقة عامل مزيج رائع مع صوت كريمة طول الاغنية و بالذات فى نهايتها 

12-  فرقة ابن عربي – احبك حبين

فريق ابن عربي من احلى الفرق اللى بتقدم الاغاني الروحية و بصراحة فى حاجة غريبة فى الدف بتاعهم بحسه غير اى دف سمعته قبل كده فى حياتي يعنى تحسه كده حاجه اكبر من خبطات الدف تحسها خبطات  قلبك ممزوجه بخبطات جاية من كوكب تاني و الناس كلها سمعاها, كل ده لما يتمزج مع شعر رابعة العدوية اللى مكتوب لربنا و مع الصوت اللى هتسمعوه ده هيطلع تراك زى ده 

11-    شهرزاد – تريز سليمان

انا عادة مش بحب الاغاني الرومانسية بتاعت انا بتقطع و تعبان من غيرك و الجو ده بس فعلا تريز سليمان باداءها و الموسيقى اللى بتحسها بتاخدك لزمن قديم اوى و الكلمات نفسها اللى غريبة و جديدة شوية takes it to a whole new level 

10-    مصطفي ابراهيم - بنكنوت

كان نفسي اقول كل تراك مسجله مصطفى ابراهيم بصوته لازم يتسمع, هو مش تراك اوى هو شعر بس انا بعتبره تراك. شعر مختلف بصراحه عن اى حاجه سمعتها قبل كده من واحد مختلف انا مسميه spokesman for a generation  زى ما كانوا مسميين بوب ديلان فى امريكا اول ما طلع علشان كلامه كان بيمس جيل الشباب زيادة عن اللزوم

9- لطفي بشناق – مولاى/سعاد

ده بالذات مش هينفع تسمعه لازم تتفرج على الفيديو ده – مش عارف انا بعشق التراك ده ليه؟ يمكن علشان صوت لطفى بشناق من كوكي تانى؟ يمكن علشان اداؤه و انفعالاته على المسرح؟ يمكن علشان الكلمات فى قصيدة سعاد و اخر جملة فيها بالذات؟ يمكن علشان المكان نفسه اللى بيغنى فيه له هيبه و التصوير كمان محلّي الموضوع زياده؟ او يمكن علشان تعبيرات وش الراجل اللى شبه وائل جمعه و هو بيسمع بتموتني؟ 

8-  انور براهم Lover of Beirut

ده اول تراك موجود فى القايمه لانور براهم اللى هتشوفوا اسمه كتير- من احلى الحاجات فيه اختياراته لاسماء التراكات بتاعته فبيخليك و انت بتسمع بتتخيل حاجات فى دماغك – من اول دخلة ال bass  جيتار فى التراك ده هتحسه بيخبط على ودنك بهدوء و ادب كده و بيستأذن قبل ما يدخل و بعدها الكلارينيت تحسها واخدة راحتها بعد استئذان ال bass  و بتدخل بهدوء مع العود و كل ده و أنور مأجل دخول الايقاع لحد ما هيدخل فى الاخر على سهوه و انت مش واخد بالك غير و جسمك بيقشعر من الحلاوة 

7- السهم التائه - Mozart in Egypt

البوم موزارت فى مصر معرفش مين اللى عمله الحقيقة بس فكرته انه بيجيب مقطوعات لموزارت و يعملها توزيع تانى و مزج مع الموسيقى الشرقي – و فى التراك ده عمل المزيج بطريقة غريبة فتسمع كمنجات من مقطوعة موزارت على ربابة من الصعيد على صوت فاطمة عيد فى الخلفية و معاها مواويل من حد معرفوش- الالبوم كله يستحق يتسمع بس دى بالذات احلى واحدة فيه 

6-  راجح داود – بسكاليا

راجح داود هو اللى عمل الموسيقى التصويرية فى كل افلام داود عبد السيد و اهم حاجه عملها فى حياته فى رايي هى موسيقى فيلم الكيت كات اللى هى نفسها مقطوعة "بسكاليا", صعوبة الموسيقي التصويرية انها لازم تكون بتعبر عن الدراما و التعقيدات اللى فى الفيلم و بسكاليا عملت ده بامتياز و تحس انها اصلا بنى ادم  من لحم و دم و بيتنفس فى التراك و معقدة  و فيها كذا طبقة زى شخصيات الفيلم بالظبط و من اول الدخلة المقبضة للكيبورد لحد الخروج الحزين للعود هتسمع 12 دقيقة من الموسيقى اللى هتحس انها بتوريك كل مشهد من الفيلم 

5- انور براهم -   Halfaouine

احلى حاجه فى التراك ده هو الايقاع (الطبله) اللى مستمر طول الاغنية بنفس الشكل و المزيكا بتدخل و تخرج تشكل عليه, الايقاع انا مش عارف اسمه بس ده الايقاع اللى بيستخدموه عمتا فى المواويل القديمة, انور براهم مزج الايقاع هنا بكلارينيت و عود و  bass جيتار كالعاده , اسمع و استمتع و ركز فى دخلة الكلارينيت اللى فى اول الاغنية 

4- ريتا – مارسيل خليفه

مارسيل خليفة اكتر واحد غنى اشعار محمود درويش بيبدأ التراك ده بصولو عود مع ماندولين مدته دقيقتين تقريبا بيمهد لحكايته مع ريتا اللى فيها  ups and downs  بتوضحها كل حته فى الموسيقي و تحسها بتاخدك من فصل لفصل فى الحدوته, احساس مارسيل و صوته الرائع و الدافي جدا و العود الفظيع بيخلوا التراك ده فعلا من احلى الحاجات اللى ممكن تتسمع و خصوصا دخلة مارسيل و هو بيقول "اسم ريتا كان عيدا فى فمي" 

3-   سقاني الغرام  Egyptian project -

شعر صوفي من احلى ما كتب فى مدح آل البيت  + صوت عظيم لسيد إمام + ربابة جاحدة للشيخ سلامة اشهر عازف ربابة فى مصر + ايقاع غربي ملوش اى علاقة باللى بنحكي فيه ده = تراك من احلى الحاجات اللى ممكن تسمعها فى حياتك, جدير بالذكر ان الناس دى كانت فى فرقة تابعة لوزارة الثقافة و بيعملو حفلات فى بيت السحيمي و دلوقتي بيلفوا العالم و بيبهروه بمزيكا من جوا مصر اوي 

2- فلامنكو صوفي - احمد التوني

ازاى ممكن تجيب راجل مش بيعرف يقرا ولا يكتب و عايش في قرية صغيرة منسية من صعيد مصر و بيغنى حاجه محلية اوي مش اى حد يفهمها اسمها انشاد ديني او مديح او انشاد صوفي كلها اشعار معقدة جدا اتكتبت من مئات السنين فى مدح النبى و آل البيت و تعمل للكلام ده كله مزج مع الفلامنكوا الاسباني اللى هو برضه غرقان فى المحلية و حاجة بتعبر اوى عن ثقافة بلد؟. ازاي فى الاخر يطلع المنتج بالحلاوة دي!!!! و ازاى الشيخ التوني له طابعة الخاص بالطريقة دى و ازاى بيحط على الناس دى كلها و بيطلع السبحة و الكاس وسط الجيتارات دى كلها و كله بيبص عليه و منبهر!! ده اكبر اثبات ان العالمية هي انك تعمل حاجه محلية اوي

1-و فى المركز الاول معانا انور براهم The astounding eyes of rita

اول ما تدوس بلاي هتسمع دخلة العود و بعدها صوت هامس بيدندن دندنة حزينة جدا جدا جدا و بعدها دخول خافت لل bass  جيتار و بعدين الكلارينيت و بعدين الطبلة علشان تكتمل سيمفونية وصف عيون ريتا المذهلة اللى هتحس من حلاوة التراك فى ودانك انك فعلا شايف ريتا قدام عينيك بس من كتر الجمال اللى انت سامعه فى ودنك مش قادر تتخيل شكلها, التراك هياخدك فى كذا حالة منهم الغموض مع صوت انور و منهم الجنون مع صولو الكلارينيت اللى فى الاخر و منهم الحزن و الشجن مع صولو العود اللى بيلعبه انور براهم نفسه, التراك ده انا من غير اي مبالغة بقالى سنتين بسمعه كل يوم قبل ما انام من كتر حلاوته هو . اطفوا النور دوسوا بلاى و استمتعوا بأنور براهم